Num 14 | NdeIBE | STEP | Ngalobobusuku abantu bonke bakuleyondawo baphakamisa amazwi abo bakhala kakhulu.

Numbers 14

Ukuhlamuka kwabantu

1 Ngalobobusuku abantu bonke bakuleyondawo baphakamisa amazwi abo bakhala kakhulu. 2 Bonke abako-Israyeli bakhonona besola uMosi lo-Aroni, yonke inhlangano yathi kubo, “Ngabe sahle sazifela eGibhithe, kumbe khonapha enkangala!

3 Kungani uJehova esilethe kulelilizwe ukuthi sife sibulawa ngenkemba na? Amakhosikazi ethu kanye labantwana bethu bazakuba yimpango. Kambe kakungcono yini ukuthi sibuyele eGibhithe na?” 4 Bakhulumisana besithi, “Asikhetheni omunye umkhokheli asibuyisele eGibhithe.”

5 Ngakho uMosi lo-Aroni bathi mbo ngobuso phansi phambi kwabantu bonke bako-Israyeli ababebuthene lapho. 6 Kwathi uJoshuwa indodana kaNuni kanye loKhalebi indodana kaJefune, ababengabanye balabo ababeyehlola ilizwe, badabula izigqoko zabo 7 bathi kubo bonke abako-Israyeli ababebuthene, “Ilizwe esadabula kulo salihlola lihle kakhulu. 8 Nxa uJehova ethokoza ngathi, uzasikhokhelela kulo, ilizwe eligeleza uchago loluju, njalo uzakusinika lona. 9 Kuphela nje lingamhlamukeli uJehova. Futhi lingabesabi abantu bakulelolizwe, ngoba sizabadla sibaqede. Kabaselaso isivikeli, kodwa uJehova ulathi. Lingabesabi.”

10 Kodwa umbuthano wonke wathi kabakhandwe ngamatshe. Inkazimulo kaJehova yasibonakala kubo bonke abako-Israyeli eThenteni lokuHlanganela. 11 UJehova wasesithi kuMosi, “Koze kube nini abantu laba bengeyisa na? Kuzaze kube nini bengangikholwa, loba sengenze izinto ezimangalisayo phakathi kwabo na? 12 Ngizabatshaya ngomkhuhlane ngibabhubhise, kodwa wena ngizakwenza ube yisizwe esikhulu njalo esilamandla kulabo.”

13 UMosi wasesithi kuJehova, “AmaGibhithe azakuzwa lokhu! Abantu laba bakhutshwa nguwe emaGibhitheni ngamandla akho.

14 Ngakho bazatshela abakhileyo kulelilizwe ngalesisenzakalo. Bavele sebezwile ukuthi wena, O Jehova, ulabo lababantu njalo lokuthi wena, Jehova, ubonakale uqondene labo ubuso ngobuso, lokuthi iyezi lakho lihlala lingaphezu kwabo, njalo lokuthi uhamba phambi kwabo ngensika yeyezi lakho emini kuthi ebusuku ngensika yomlilo. 15 Pho ungababhubhisa abantu bonke laba ngasikhathi sinye, izizwe esezizwile ngalezizindaba ngawe zizakuthi,

16 ‘UJehova wehlulekile ukungenisa abantu laba elizweni abathembisa lona ngesifungo; ngakho usebabhubhisele enkangala.’

17 “Amandla kaJehova kabonakaliswe khathesi, njengokutsho kwakho ukuthi:

18 ‘UJehova uyaphuza ukuthukuthela, ugcwele ngothando njalo uyathethelela isono lokuhlamuka. Kodwa kayikubayekela abalecala bengajeziswanga; ujezisa abantwana ngenxa yezono zaboyise kuze kube kusizukulwane sesithathu lesesine.’ 19 Thethelela isono salababantu, ngenxa yothando lwakho olukhulu, ubaxolele njengokubaxolela kwakho kusukela ngesikhathi abasuka ngaso eGibhithe kuze kube khathesi.”

20 UJehova waphendula wathi, “Sengibaxolele njengesicelo sakho. 21 Impela njengoba ngiphila, lanjengoba inkazimulo kaJehova igcwalise umhlaba wonke,

22 akulamuntu loyedwa owabona inkazimulo yami kanye lezibonakaliso zezimanga engazenza eGibhithe lasenkangala kodwa kaze angilalela njalo wangilinga okungaba ngamahlandla alitshumi – 23 akukho loyedwa wabo ozalibona ilizwe engalithembisayo mina ngesifungo kubokhokho babo. Futhi kakho loyedwa ongidelelayo ozalibona. 24 Kodwa ngenxa yokuthi inceku yami uKhalebi ulomoya owehlukileyo njalo ungilandela ngenhlizinyo yakhe yonke, ngizamngenisa elizweni afika kulo, lizakuba yilifa lezizukulwane zakhe.

25 Njengoba ama-Amaleki lamaKhenani ehlala ezigodini, lina phendukani kusasa liqonde enkangala ngendlela yasoLwandle oLubomvu.”

26 UJehova wathi kuMosi lo-Aroni: 27 “Koze kube nini lababantu abangalunganga bekhonona bengisola na? Sengizwile ukusola lokukhonona kwabako-Israyeli. 28 Ngakho batshele uthi, ‘Njengoba ngiphila impela, utsho uJehova, ngizakwenza kini zona lezozinto engilizwe lizikhuluma. 29 Izidumbu zenu zizagcwala enkangala yonale – lina lonke elabalwayo ngesikhathi sokubalwa kwabantu elileminyaka yokuzalwa engamatshumi amabili kusiya phezulu labo bonke abakade bekhonona bengisola. 30 Kakho loyedwa wenu ozangena elizweni engafunga ngokuphakamisa isandla ukuthi libe likhaya lenu, ngaphandle kukaKhalebi indodana kaJefune loJoshuwa indodana kaNuni. 31 Mayelana labantwana benu labo elathi bazakuba yimpango, ngizabangenisa elizweni lelo elilalileyo ukuze bathokoze kilo.

32 Kodwa lina – izidumbu zenu zizawohlokela kule inkangala. 33 Abantwana benu bazakuba ngabelusi lapha okweminyaka engamatshumi amane, behlupheka ngenxa yokungathembeki kwenu, kuze kungcwatshwe isidumbu sokucina enkangala. 34 Okweminyaka engamatshumi amane – umnyaka munye umele usuku lunye elahlola ngalo ilizwe – lizahlupheka ngenxa yezono zenu lize lazi ukuthi kuyinto enjani nxa mina ngimelana lani.’ 35 Mina, uJehova, sengikhulumile, njalo ngempela ngizazenza lezizinto ebantwini laba bonke, abamanyeneyo bemelana lami. Bazabhubha kuyonale inkangala; bazafela khonapha.”

36 Ngakho amadoda ayethunywe nguMosi ukuthi ayehlola ilizwe, lawo athi ekuphendukeni kwawo amemethekisa umbiko omubi owabangela ukuthi abantu bakhonone besola uMosi – 37 lawomadoda amemethekisa umbiko ongalunganga mayelana lelizwe atshaywa ngomkhuhlane afa phambi kukaJehova. 38 Emadodeni ayeyehlola ilizwe, kwasila kuphela uJoshuwa indodana kaNuni kanye loKhalebi indodana kaJefune.

39 Kwathi lapho uMosi esebikele bonke abako-Israyeli, bakhala kabuhlungu. 40 Ngosuku olulandelayo ekuseni kakhulu baqonda elizweni lezintaba eziphakemeyo. Bathi, “Sonile, sizakuya kuleyondawo esayithenjiswa nguJehova.”

41 Kodwa uMosi wathi kubo, “Kungani lingalaleli umlayo kaJehova? Lokhu elikwenzayo akusoze kuphumelele!

42 Lingakhuphuki, ngoba uJehova kalisekeli. Lizanqotshwa yizitha zenu, 43 ngoba lizaqondana lama-Amaleki kanye lamaKhenani khonale. Ngenxa yokuthi limhlamukile uJehova, yena kayikuba lani ngakho lizabhujiswa ngenkemba.”

44 Loba kunjalo, baqhubeka beqonde elizweni lezintaba benganakile, loba uMosi kumbe ibhokisi lesivumelwano sikaJehova kungasukanga ezihonqweni. 45 Ngakho ama-Amaleki lamaKhenani ayehlala kulelolizwe lezintaba ehla abahlasela abatshaya ebaxotsha baze bayafika eHoma.